રિયલ એસ્ટેટમાં ડોલરનો વરસાદ! ત્રીજા ક્વાર્ટરમાં $6.4 અબજનું રોકાણ

ભારતના રિયલ એસ્ટેટ ક્ષેત્રમાં વિદેશી રોકાણકારોની વાપસીથી રોકાણ પ્રવાહમાં નોંધપાત્ર વધારો જોવા મળ્યો છે. ખાસ કરીને ડેટા સેન્ટર્સ માટે વધતી માંગ અને સંસ્થાગત રોકાણમાં વધારો થતાં 2026ના ત્રીજા ત્રિમાસિક ગાળામાં રિયલ એસ્ટેટ ક્ષેત્રમાં રેકોર્ડ $6.4 અબજનું રોકાણ આવ્યું છે. આ સાથે વર્ષના પ્રથમ નવ મહિનામાં કુલ રોકાણ $16.8 અબજ સુધી પહોંચી ગયું છે.

વિદેશી રોકાણકારોનો હિસ્સો 55% રહ્યો

ત્રીજા ત્રિમાસિક ગાળામાં આવેલા કુલ રોકાણમાં વિદેશી રોકાણકારોનો હિસ્સો લગભગ 55% રહ્યો હતો. તેમાં અમેરિકન રોકાણકારોનો હિસ્સો 60% રહ્યો હતો. ત્યારબાદ કેનેડા, સિંગાપોર અને જાપાનના રોકાણકારોનું સ્થાન રહ્યું હતું. સંસ્થાગત રોકાણકારોની ભાગીદારીમાં પણ વધારો જોવા મળ્યો હતો. ત્રીજા ત્રિમાસિક ગાળામાં સંસ્થાગત રોકાણકારોનો હિસ્સો કુલ રોકાણના લગભગ 78% સુધી રહ્યો હતો, જે અગાઉના ત્રિમાસિક ગાળાની સરખામણીએ 28% વધુ છે.

ડેટા સેન્ટર્સ તરફ વધી રહ્યું છે રોકાણ

ત્રીજા ત્રિમાસિક ગાળામાં ડેટા સેન્ટર્સ, તૈયાર ઓફિસ પ્રોપર્ટી અને જમીન/ડેવલપમેન્ટ સાઇટ્સ મળીને કુલ રોકાણમાં લગભગ 81% હિસ્સો ધરાવતા હતા. રોકાણકારો સ્થાપિત તેમજ ઉભરતી પ્રોપર્ટી કેટેગરીમાં મૂડી લગાવી રહ્યા છે. સંસ્થાગત મૂડી હવે પરંપરાગત ઓફિસ અને જમીનથી આગળ વધીને ડેટા સેન્ટર્સ તરફ પણ જઈ રહી છે.

પ્રથમ નવ મહિનામાં $16.8 અબજનું રોકાણ

2026ના પ્રથમ નવ મહિનામાં રિયલ એસ્ટેટ ક્ષેત્રમાં કુલ રોકાણ $16.8 અબજ સુધી પહોંચી ગયું છે. અગાઉ સમગ્ર 2025 દરમિયાન ભારતમાં કુલ વિદેશી રિયલ એસ્ટેટ રોકાણ $14.2 અબજ રહ્યું હતું. વૈશ્વિક અને સ્થાનિક રોકાણકારો ભારતમાં પોતાના પોર્ટફોલિયોને વિસ્તારવામાં રસ દર્શાવી રહ્યા છે. જોકે, ભૌગોલિક-રાજકીય અનિશ્ચિતતા અને વ્યાજદરમાં ફેરફાર જેવા મુદ્દાઓ આગામી ત્રિમાસિક ગાળાના રોકાણ પર અસર કરી શકે છે.

આ પણ વાંચો : Stocks In News | 6 October 2026: આજે કયા Top Share ફોકસમાં રહી શકે

આ પણ જુઓ :

Watch onYouTube