SIP vs Lumpsum: દર મહિને ₹5,000 ની SIP કે ₹5 લાખનું એકસાથે રોકાણ, 10 વર્ષમાં શેમાં મળશે વધુ રિટર્ન?

SIP vs Lumpsum investment: આજના સમયમાં દરેક વ્યક્તિ ઈચ્છે છે કે તેની મહેનતની કમાણી પર તેને સૌથી સારું વળતર મળે. આજકાલ રોકાણ માટે લોકો મ્યુચ્યુઅલ ફંડ પર સૌથી વધુ પસંદગી ઉતારી રહ્યા છે. જો તમે પણ મ્યુચ્યુઅલ ફંડમાં પૈસા રોકવાનું વિચારી રહ્યા છો, તો તમારા મનમાં ચોક્કસ એક સવાલ થતો હશે કે કઈ પદ્ધતિથી વધુ નફો મળે? દર મહિને થોડા થોડા પૈસાની SIP (સિસ્ટમેટિક ઇન્વેસ્ટમેન્ટ પ્લાન) કરવી સારી કે પછી કોઈ મોટી રકમ એક જ વારમાં લમ્પસમ (Lump Sum) રોકાણ કરવી સારી? ચાલો આ બંને રોકાણ પદ્ધતિઓનો તફાવત સમજીએ અને જોઈએ કે 10 વર્ષમાં કઈ રીતથી વધુ વળતર મળે છે.

SIP અને લમ્પસમ રોકાણ વચ્ચે શું તફાવત છે?

SIP દ્વારા તમે મ્યુચ્યુઅલ ફંડમાં દર મહિને એક ચોક્કસ નાની રકમનું રોકાણ કરો છો. આનો સૌથી મોટો ફાયદો એ છે કે તમારે એક સાથે મોટી રકમ જમા કરવાની જરૂર પડતી નથી. તમે તમારી માસિક આવકમાંથી નાની બચત કરીને પણ રોકાણ શરૂ કરી શકો છો. આ સિવાય, SIP માં બજારના ઉતાર ચઢાવનો સીધો ફાયદો મળે છે. બજાર નીચે જાય ત્યારે તમને વધુ યુનિટ મળે છે, જેને રૂપી કોસ્ટ એવરેજિંગ (Rupee Cost Averaging) કહેવાય છે.

બીજી બાજુ, લમ્પસમ રોકાણમાં તમારે એક જ વારમાં મોટી રકમ રોકવાની હોય છે. આનો ફાયદો એ છે કે તમારા બધા પૈસા પહેલા જ દિવસથી બજારમાં કામે લાગી જાય છે. જો શેરબજાર સળંગ ઊંચે જતું રહે તો તમને પૂરી રકમ પર જંગી વળતર મળે છે. પણ જો તમે પૈસા રોકો અને બજાર તૂટે, તો નુકસાન થવાનું જોખમ પણ મોટું રહે છે.

દર મહિને 5,000 ની SIP કરવાથી 10 વર્ષમાં કેટલા મળશે?

જો તમે દર મહિને 5,000 રૂપિયાની SIP શરૂ કરો છો અને તેને સળંગ 10 વર્ષ સુધી ચાલુ રાખો છો, તો 10 વર્ષ પછી તમારી પાસે સારું એવું ભંડોળ ભેગું થશે. ધારો કે તમને વાર્ષિક 12% વળતર મળે છે, તો:

તમારું કુલ માસિક રોકાણ: 6,00,000 રૂપિયા

12% લેખે અંદાજિત વળતર (નફો): 5,61,695 રૂપિયા

10 વર્ષ પછી તમારું કુલ ભંડોળ: 11,61,695 રૂપિયા થશે.

એક સાથે 5 લાખ રોકવાથી 10 વર્ષમાં કેટલો ફાયદો થશે?

હવે જો તમે મ્યુચ્યુઅલ ફંડમાં એક જ વારમાં 5 લાખ રૂપિયાનું લમ્પસમ રોકાણ કરી દો છો અને તેને 10 વર્ષ માટે છોડી દો છો, તો 12% વાર્ષિક વળતરના અંદાજ મુજબ:

તમારું કુલ રોકાણ: 5,00,000 રૂપિયા

12% લેખે અંદાજિત વળતર (નફો): 10,52,924 રૂપિયા

10 વર્ષ પછી તમારું કુલ ભંડોળ: 15,52,924 રૂપિયા થશે.

કયું રોકાણ વધારે ફાયદાકારક છે?

આ આંકડાઓ પરથી સ્પષ્ટ દેખાય છે કે 5 લાખ રૂપિયાનું એકસાથે રોકાણ કરવાથી 10 વર્ષમાં (15.52 લાખ) વધુ ભંડોળ બને છે, જ્યારે 5,000 ની SIP કરવાથી થોડું ઓછું (11.61 લાખ) વળતર મળે છે. આવું થવાનું મુખ્ય કારણ એ છે કે લમ્પસમમાં તમારી આખી રકમ પહેલા જ મહિનાથી 12% વ્યાજ કમાવવાનું શરૂ કરી દે છે. જ્યારે SIP માં તમે પૈસા હપ્તે હપ્તે આપો છો, એટલે પૂરી રકમ પર નફો મળતા વાર લાગે છે. જોકે, નિષ્ણાતો માને છે કે મ્યુચ્યુઅલ ફંડમાં રોકાણ કરતી વખતે માત્ર વળતર જ નહીં, પણ તમારું જોખમ લેવાની ક્ષમતા (Risk Tolerance) પણ જોવી જોઈએ. મ્યુચ્યુઅલ ફંડમાં 12% વળતર ફિક્સ હોતું નથી, તે બજારની ચાલ પર આધાર રાખે છે. જો તમારી પાસે મોટી રકમ પડી છે અને તમે જોખમ લેવા તૈયાર છો, તો લમ્પસમ રોકાણ સારું છે. પણ જો તમે નોકરીયાત વર્ગના છો અને નાની બચતથી સુરક્ષિત મોટું ફંડ બનાવવા માંગો છો, તો SIP તમારા માટે શ્રેષ્ઠ વિકલ્પ છે.

આ પણ વાંચોઃ Stocks to Buy: આ 4 શેરમાં 87% સુધીની તેજીના સંકેત, મોતીલાલ ઓસ્વાલ સહિત મોટા બ્રોકરેજિસની સલાહ

આ પણ જુઓ

Watch onYouTube