લોન ન ચૂકવાય તો રિકવરી એજન્ટ વાહન જપ્ત ન કરી શકે: અલ્હાબાદ હાઈકોર્ટનો મોટો ચુકાદો

High Court ruling: અલ્હાબાદ હાઈકોર્ટે વાહન લોનની વસૂલાતને લઈને એક અત્યંત મહત્વનો ચુકાદો આપ્યો છે. કોર્ટે સ્પષ્ટ શબ્દોમાં કહ્યું છે કે જો કોઈ ગ્રાહક લોનના હપ્તા ચૂકવવામાં નિષ્ફળ જાય, તો ફાઇનાન્સ કંપનીઓ ગુંડાઓ કે રિકવરી એજન્ટો દ્વારા તેનું વાહન જપ્ત કરી શકતી નથી. હાઈકોર્ટે નિર્દેશ આપ્યો છે કે જો ફાઇનાન્સ કંપનીને વાહન જપ્ત કરવાનો અધિકાર હોય, તો પણ તેણે કાનૂની પ્રક્રિયાનું પાલન કરવું જ પડશે. એક તાજેતરના કેસમાં કોર્ટે ફાઇનાન્સ કંપનીને આકરો ઠપકો આપ્યો હતો. કંપનીને આદેશ અપાયો છે કે જપ્ત કરાયેલું વાહન તાત્કાલિક માલિકને પરત કરવામાં આવે, અને સાથે જ કંપની પર 10000 રૂપિયાનો દંડ પણ ફટકારવામાં આવ્યો છે.

જસ્ટિસ જે.જે. મુનીર અને જસ્ટિસ ઇન્દ્રજીત શુક્લાની બેન્ચે નોંધ્યું હતું કે કરાર હેઠળ કંપની વાહન જપ્ત કરી શકે છે, પરંતુ તે સિવિલ કોર્ટ અથવા મધ્યસ્થી જેવા કાનૂની માધ્યમથી જ થવું જોઈએ. એજન્ટો દ્વારા રસ્તામાં રોકીને વાહન છીનવી લેવાની પ્રથાને કોર્ટે બળજબરી ગણાવી છે. કોર્ટે કહ્યું કે ખાનગી કંપનીઓને રાજ્યની જેમ બળજબરીથી કામ કરવાની કે કાયદો પોતાના હાથમાં લેવાની કોઈ સત્તા નથી.

શું હતો સમગ્ર મામલો?

આ કેસ સદાબ અહેમદ નામના વ્યક્તિનો છે. સદાબે ડિસેમ્બર 2023 માં એક ટાટા કાર્ગો વાહન ખરીદ્યું હતું, જેના માટે HDB ફાઇનાન્સિયલ સર્વિસિસે લોન આપી હતી. કરાર મુજબ સદાબે 45 હપ્તામાં કુલ 64059 રૂપિયા ચૂકવવાના હતા. તેમણે 45 માંથી 31 હપ્તા નિયમિત ચૂકવ્યા હતા. તેમ છતાં 9 ઓગસ્ટ 2026 ના રોજ કંપનીના કેટલાક એજન્ટોએ તેમને ચંદૌલી પાસેના હાઇવે પર રોક્યા. એવો આરોપ છે કે આ લોકોએ બંદૂકની અણીએ સદાબને ધમકાવીને બળજબરીથી વાહન પડાવી લીધું અને જપ્ત કરેલા સામાનની યાદી પર પરાણે સહી કરાવી. કોર્ટે નોંધ્યું કે કંપનીએ બંદૂકની અણીએ વાહન લેવાના આરોપનો ક્યારેય ઇનકાર કર્યો ન હતો.

પોલીસ કે વહીવટીતંત્રએ ન કરી મદદ

વાહન છીનવાઈ ગયા પછી સદાબે ફાઇનાન્સ કંપની, સ્થાનિક પોલીસ અને જિલ્લા મેજિસ્ટ્રેટને પણ ફરિયાદ કરી હતી. પરંતુ કોઈ મદદ ન મળતા અંતે તેમણે અલ્હાબાદ હાઈકોર્ટના દરવાજા ખખડાવ્યા. કોર્ટે સુનાવણીમાં સ્પષ્ટ કર્યું કે કંપની બળજબરીથી કે પ્રભાવશાળી લોકો દ્વારા વાહન જપ્ત ન કરી શકે, અને આવું કરવા માટે માત્ર કાયદાકીય પ્રક્રિયા જ અપનાવવી પડે.

હાઈકોર્ટનો કડક આદેશ

અલ્હાબાદ હાઈકોર્ટે HDB ફાઇનાન્સિયલ સર્વિસિસને આદેશ આપ્યો કે સદાબ અહેમદનું વાહન કોઈપણ શરત વિના તરત પાછું આપવામાં આવે. આ સાથે બાકી રકમ ભરવા માટે લોનનું પુનર્ગઠન (રિસ્ટ્રક્ચરિંગ) કરવાનો પણ નિર્દેશ અપાયો છે. કોર્ટે સ્પષ્ટતા કરી કે આ પ્રક્રિયા દરમિયાન કંપની કોઈ પેનલ્ટી કે દંડાત્મક વ્યાજ વસૂલી શકશે નહીં. કાયદાનું ખુલ્લેઆમ ઉલ્લંઘન કરવા બદલ કંપનીને 10000 રૂપિયાનો દંડ પણ ફટકારવામાં આવ્યો છે.

આ પણ વાંચોઃ Denza D9 Price in India: 730 કિમી રેન્જ અને મસાજ સીટ સાથે BYD ની લક્ઝરી કાર ભારતમાં આવી

આ પણ જુઓ

Watch onYouTube