ટોલ કલેક્શનમાં નવો રેકોર્ડ! ઓક્ટોબરમાં ₹6,640 કરોડની વસૂલાત, FASTag-UPIનો ઉપયોગ વધતાં રોકડ વ્યવહારો ઘટ્યા

India Highway Toll Collection: ભારતના રાષ્ટ્રીય ધોરીમાર્ગો અને એક્સપ્રેસવે પર ટોલ કલેક્શને નવો રેકોર્ડ રચ્યો છે. ઓક્ટોબર 2026માં દેશમાં ટોલ કલેક્શન આશરે 6,640 કરોડ રૂપિયાના માસિક સ્તરે પહોંચ્યું છે. ગયા વર્ષના સમાન સમયગાળાની સરખામણીએ ટોલ વસૂલાતમાં 16 ટકાનો વધારો નોંધાયો છે. એક તરફ ધોરીમાર્ગો પર વાહનોની અવરજવર અને આર્થિક પ્રવૃત્તિઓમાં વધારો જોવા મળી રહ્યો છે, તો બીજી તરફ ટોલ પ્લાઝા પર રોકડને બદલે FASTag અને UPI જેવા ડિજિટલ પેમેન્ટનો ઉપયોગ પણ વધી રહ્યો છે.

ટોલ વસૂલાતના જૂનો રેકોર્ડ તૂટ્યો

દેશના રાષ્ટ્રીય ધોરીમાર્ગો અને એક્સપ્રેસવે પર ઓક્ટોબર મહિનામાં આશરે 6,640 કરોડ રૂપિયાનું ટોલ કલેક્શન થયું છે. અત્યાર સુધીના કોઈપણ એક મહિનાની સરખામણીએ આ સૌથી વધુ વસૂલાત છે. ઓક્ટોબર 2025માં ટોલ કલેક્શન આશરે 5,715 કરોડ રૂપિયા રહ્યું હતું. તેની સરખામણીએ ઓક્ટોબર 2026માં ટોલ વસૂલાત લગભગ 16 ટકા વધી છે. આ અગાઉ સૌથી વધુ માસિક ટોલ કલેક્શનનો રેકોર્ડ મે 2026માં નોંધાયો હતો. તે સમયે કુલ 6,185 કરોડ રૂપિયાની વસૂલાત થઈ હતી. હવે ઓક્ટોબરના આંકડાએ અગાઉનો રેકોર્ડ પણ પાછળ છોડી દીધો છે. ટોલ કલેક્શનમાં થયેલો આ વધારો દેશના ધોરીમાર્ગ નેટવર્ક પર વાહનોની અવરજવર અને આર્થિક પ્રવૃત્તિઓમાં વૃદ્ધિનો સંકેત માનવામાં આવી રહ્યો છે.

આ વર્ષે કુલ ટોલ કલેક્શન ₹74,000 કરોડ સુધી પહોંચી શકે

રાષ્ટ્રીય ધોરીમાર્ગો પર ટોલ કલેક્શનમાં સતત જોવા મળી રહેલી વૃદ્ધિને ધ્યાનમાં રાખીને અધિકારીઓએ ચાલુ વર્ષ માટે મોટો અંદાજ વ્યક્ત કર્યો છે. અહેવાલો અનુસાર, વર્તમાન વલણ જળવાઈ રહેશે તો આ વર્ષે કુલ ટોલ વસૂલાત આશરે 74,000 કરોડ રૂપિયા સુધી પહોંચી શકે છે. નોંધનીય છે કે, આ રકમ હાલમાં અંદાજિત છે. જોકે, વાર્ષિક ટોલ કલેક્શન આગામી મહિનાઓમાં થનારી વસૂલાત પર આધારિત રહેશે.

રોકડ ચુકવણીમાં મોટો ઘટાડો

ટોલ વસૂલાતમાં વધારા સાથે ચુકવણી કરવાની પદ્ધતિમાં પણ નોંધપાત્ર પરિવર્તન જોવા મળ્યું છે. ટોલ પ્લાઝા પર રોકડને બદલે ડિજિટલ પેમેન્ટનો ઉપયોગ ઝડપથી વધી રહ્યો છે. ઓક્ટોબર 2025માં રોકડ દ્વારા આશરે 84 કરોડ રૂપિયાનું ટોલ કલેક્શન થયું હતું. તેની સરખામણીએ ઓક્ટોબર 2026માં રોકડ વસૂલાત ઘટીને માત્ર 4 કરોડ રૂપિયા રહી ગઈ છે. બીજી તરફ, UPI દ્વારા ટોલ ચુકવણીમાં મોટો વધારો નોંધાયો છે. ઓક્ટોબર 2026માં UPI મારફતે આશરે 100 કરોડ રૂપિયાનું ટોલ કલેક્શન થયું હતું. જ્યારે અહેવાલ મુજબ ઓક્ટોબર 2025માં આ માધ્યમથી ટોલ વસૂલાત નોંધાઈ નહોતી.

વાહનોની અવરજવર અને આર્થિક પ્રવૃત્તિઓ માટે મહત્ત્વપૂર્ણ સંકેત

રાષ્ટ્રીય ધોરીમાર્ગો દેશના પરિવહન અને માલસામાનની હેરફેરમાં મહત્વપૂર્ણ ભૂમિકા ભજવે છે. તેથી ટોલ કલેક્શનમાં થતો વધારો આર્થિક પ્રવૃત્તિઓ અને વાહનોની અવરજવરના વલણને સમજવા માટે ઉપયોગી સંકેત બની શકે છે. ઓક્ટોબર 2026માં નોંધાયેલું 6,640 કરોડ રૂપિયાનું રેકોર્ડ ટોલ કલેક્શન એક તરફ ધોરીમાર્ગો પરથી થતી વસૂલાતમાં વૃદ્ધિ દર્શાવે છે, તો બીજી તરફ ટોલ ચુકવણીમાં ડિજિટલ માધ્યમોનું વધતું મહત્ત્વ પણ સામે લાવે છે. ખાસ કરીને રોકડ કલેક્શન 84 કરોડ રૂપિયાથી ઘટીને 4 કરોડ રૂપિયા થવું અને UPIથી 100 કરોડ રૂપિયાની વસૂલાત થવી એ ટોલ ચુકવણીની પદ્ધતિમાં આવી રહેલા મોટા પરિવર્તનને દર્શાવે છે.

આ પણ વાંચો: ભારત-નેપાળ વચ્ચે દોડશે નવી ટ્રેન, અયોધ્યા-જનકપુર વચ્ચે 604 કિમીની રેલસેવાને મંજૂરી