Upcoming Ipo: 4 કંપનીઓની IPO માર્કેટમાં એન્ટ્રી પાકી! SEBIએ બતાવી લીલીઝંડી

ભારતીય શેરબજારમાં IPOની લાઇન વધુ લાંબી થઈ રહી છે. હવે Carlsberg India, TMC Transformers, Ujin Pharma અને Matangi Rubber IPO લાવવાની તૈયારીમાં આગળ વધ્યા છે. આ ચારેય કંપનીઓને તેમના IPO માટે SEBIની મંજૂરી મળી છે. SEBIની મંજૂરી મળ્યા બાદ કંપનીઓ હવે IPO લાવવાની આગળની તૈયારી કરી શકે છે. જોકે, તેનો અર્થ એ નથી કે ચારેય IPO તરત જ બજારમાં આવી જશે. IPO ખોલતા પહેલાં કંપનીઓએ કેટલીક બાકી પ્રક્રિયા અને નિયમનકારી જરૂરિયાતો પૂરી કરવાની રહેશે.

Carlsberg Indiaનો IPO પણ ચર્ચામાં

કાર્લ્સબર્ગની ભારતીય કંપની કાર્લ્સબર્ગ ઈન્ડિયા લિમિટેડે 1 જુલાઈએ SEBI સમક્ષ IPOના દસ્તાવેજો રજૂ કર્યા હતા. હવે SEBIની મંજૂરી મળતાં કંપની IPO લાવવાની દિશામાં એક પગલું આગળ વધી છે. જોકે, કાર્લ્સબર્ગ ઈન્ડિયા IPOની કુલ રકમ કેટલી હશે તેની માહિતી હાલમાં જાહેર કરવામાં આવી નથી.

TMC ટ્રાન્સફોર્મરનો ₹550 કરોડનો IPO

TMC Transformers (India) Limited ₹550 કરોડનો IPO લાવશે. કંપની આ IPOમાં નવા શેર જારી કરશે અને હાલના શેરધારકોના શેર વેચાણનો સમાવેશ નહીં થાય. IPOમાંથી મળેલી રકમનો મોટો હિસ્સો ગુજરાતના હલોલમાં નવો ટ્રાન્સફોર્મર બનાવવાનો પ્લાન્ટ ઉભો કરવા માટે વપરાશે. આ પ્લાન્ટમાં અતિઉચ્ચ વોલ્ટેજ ટ્રાન્સફોર્મર બનાવવામાં આવશે અને તેની ક્ષમતા 78,000 MVA રાખવાની યોજના છે. કંપની IPOની રકમનો ઉપયોગ ધંધા માટે જરૂરી કાર્યકારી મૂડી અને અન્ય સામાન્ય કંપનીના ખર્ચ માટે પણ કરશે.

Ujin Pharmaના IPOમાં શું ખાસ?

ઉજિન ફાર્મા લિમિટેડના IPOમાં 1.18 કરોડ નવા શેર જારી કરવામાં આવશે. આ ઉપરાંત કંપનીના પ્રમોટરો જિનેશ રસિકલાલ શેઠ અને ઉમંગ કેતન મહેતા 72.82 લાખ સુધીના પોતાના શેર વેચશે. કંપની નવા શેરમાંથી મળનારી રકમમાંથી ₹61.7 કરોડ અલ્ટ્રા એગ્રો-કેમમાં અને ₹21.6 કરોડ અલ્ટ્રા ફાર્મા-કેમમાં રોકાણ કરશે. આ રોકાણ બાદ બંને કંપનીઓ ઉજિન ફાર્માની સહાયક કંપની બનવાની અપેક્ષા છે. આ ઉપરાંત કંપની ₹25 કરોડ સુધીની લોન ચૂકવવા અથવા અગાઉથી ચુકવણી કરવા પણ રકમનો ઉપયોગ કરશે.

આ પણ વાંચો: સપ્ટેમ્બરમાં મૂડીબજારમાં તડાકો, પણ ભડાકો તો હજી બાકી છે...

Matangi Rubberને પણ મંજૂરી

Matangi Rubber Limitedને પણ તેના IPO માટે SEBIની મંજૂરી મળી છે. જોકે, હાલમાં ઉપલબ્ધ માહિતીમાં Matangi Rubberના IPOની કુલ રકમ અને તેમાં નવા શેર તથા હાલના શેરના વેચાણની ચોક્કસ વિગતો જાહેર કરવામાં આવી નથી.

હવે આગળ શું?

આ ચાર કંપનીઓ માટે SEBIની મંજૂરી IPOની પ્રક્રિયામાં મહત્વનું પગલું છે. હવે કંપનીઓ IPOની અંતિમ તૈયારી કરશે અને ત્યારબાદ બજારમાં IPO ક્યારે લાવવો તેની જાહેરાત કરી શકે છે.

આ પણ જુઓ

Watch onYouTube