અમૂલની છાશમાં 'શ્રિંકફ્લેશન'નો ઝટકો! ભાવ એ જ, પણ પાઉચમાં હવે મળશે ઓછી છાશ

Amul Buttermilk Shrinkflation: અમૂલના દૂધ અને દહીંના ભાવમાં વધારા બાદ હવે છાશ ખરીદતા ગ્રાહકોને પણ મોંઘવારીનો આડકતરો ઝટકો લાગ્યો છે. અમૂલ દ્વારા છાશના વિવિધ પાઉચની કિંમતમાં કોઈ ફેરફાર કરવામાં આવ્યો નથી, પરંતુ તેમાં મળતી છાશની માત્રા ઘટાડી દેવામાં આવી છે. એટલે કે ગ્રાહકોએ છાશ ખરીદવા માટે અગાઉ જેટલા જ રૂપિયા ચૂકવવાના રહેશે, પરંતુ હવે તેને ઓછી છાશ મળશે. કંપનીએ 5, 10 અને 20 રૂપિયાના છાશના પાઉચની માત્રામાં ઘટાડો કર્યો છે. ભાવ યથાવત્ રાખીને ઉત્પાદનની માત્રા ઘટાડવાની આ પદ્ધતિને 'શ્રિંકફ્લેશન' (Shrinkflation) કહેવાઈ છે.

20 રૂપિયાના છાશના પાઉચમાં 30 ML ઓછી છાશ મળશે

અમૂલની છાશના 20 રૂપિયાના પાઉચમાં અગાઉ ગ્રાહકોને 650 ML છાશ મળતી હતી. હવે કંપનીએ આ પાઉચની માત્રામાં 30 MLનો ઘટાડો કર્યો છે. એટલે કે 20 રૂપિયાના પાઉચમાં હવે ગ્રાહકોને 650 MLને બદલે 620 ML છાશ મળશે. જોકે, પાઉચની કિંમત 20 રૂપિયા જ રાખવામાં આવી છે. આ ફેરફારને કારણે ગ્રાહકોએ અગાઉ જેટલા જ રૂપિયા ચૂકવવા છતાં છાશની ઓછી માત્રાથી સંતોષ માનવો પડશે.

અમૂલના 10 રૂપિયાના છાશના પાઉચમાં પણ માત્રા ઘટાડવામાં આવી છે. અગાઉ આ પાઉચમાં 300 ML છાશ મળતી હતી, પરંતુ હવે તેની માત્રા ઘટાડીને 280 ML કરવામાં આવી છે. 10 રૂપિયાના પાઉચમાં 20 ML છાશ ઓછી મળશે. કિંમતમાં કોઈ ફેરફાર કરવામાં આવ્યો નથી. પરિણામે, નિયમિત રીતે આ પાઉચ ખરીદતા ગ્રાહકોને સમાન કિંમતે ઓછી માત્રા મળશે.

નાના પાઉચ ખરીદતા ગ્રાહકોને પણ અમૂલના આ નિર્ણયની અસર થશે. 5 રૂપિયાની જીરા છાશના પાઉચમાં અગાઉ 150 ML છાશ મળતી હતી. હવે આ પાઉચની માત્રામાં 10 MLનો ઘટાડો કરવામાં આવ્યો છે. એટલે કે ગ્રાહકોને 5 રૂપિયામાં હવે 140 ML જીરા છાશ મળશે. ખાસ કરીને ઓછી કિંમતના નાના પાઉચ ખરીદતા ગ્રાહકોને આ ફેરફારની સીધી અસર થશે.

શ્રિંકફ્લેશન શું છે? ભાવ વધાર્યા વગર ગ્રાહકનો ખર્ચ કેવી રીતે વધે છે?

શ્રિંકફ્લેશન (Shrinkflation) એવી પદ્ધતિ છે, જેમાં કંપની કોઈ ઉત્પાદનની વેચાણ કિંમત યથાવત્ રાખે છે, પરંતુ તેના પેકેટનું વજન અથવા માત્રા ઘટાડી દે છે. જેમ કે, કોઈ વસ્તુના પેકેટની કિંમત 10 રૂપિયા હોય અને તેમાં અગાઉ 300 ML ઉત્પાદન મળતું હોય, પરંતુ હવે એ જ કિંમતે 280 ML ઉત્પાદન આપવામાં આવે, તો તેને શ્રિંકફ્લેશન કહેવાય. આ પદ્ધતિમાં ગ્રાહકને સીધો ભાવ વધારો દેખાતો નથી, પરંતુ ઉત્પાદનની માત્રા ઘટવાથી પ્રતિ યુનિટ કિંમત વધી જાય છે. એટલે કે ગ્રાહકને અગાઉ જેટલી વસ્તુ ખરીદવા માટે હવે પ્રમાણમાં વધુ ખર્ચ કરવો પડે છે.

દૂધ અને દહીં બાદ છાશમાં પણ ગ્રાહકોને મોંઘવારીની અસર

અમૂલ દ્વારા દૂધ અને દહીંના ભાવમાં વધારો કરવામાં આવ્યો છે. જોકે, છાશના પાઉચમાં સીધો ભાવ વધારો કરવાને બદલે તેની માત્રા ઘટાડવાનો નિર્ણય લેવામાં આવ્યો છે. આ ફેરફારથી ગ્રાહકોને છાશ ખરીદતી વખતે અગાઉ જેટલી જ કિંમત ચૂકવવી પડશે, પરંતુ પાઉચમાં મળતી માત્રા ઓછી હશે. જેથી ગ્રાહકો માટે કોઈપણ પેકેટબંધ ઉત્પાદન ખરીદતી વખતે માત્ર તેની કિંમત જ નહીં, પરંતુ પેકેટ પર દર્શાવેલી માત્રા પણ તપાસવી મહત્ત્વપૂર્ણ બની જાય છે.

આ પણ વાંચો: Amul Price Hike: મોંઘવારીનો ડબલ ઝટકો! દૂધ બાદ હવે અમૂલ દહીંના ભાવમાં વધારો