Amul Price Hike: મોંઘવારીનો ડબલ ઝટકો! દૂધ બાદ હવે અમૂલ દહીંના ભાવમાં વધારો

અમૂલ દૂધના ભાવમાં વધારા બાદ હવે દહીં અને લસ્સી પણ મોંઘા થયા છે. કંપનીના નવા ભાવપત્રક મુજબ દહીંની અલગ-અલગ પેકિંગની કિંમતોમાં વધારો કરવામાં આવ્યો છે. દૈનિક ઉપયોગની આ ડેરી પ્રોડક્ટ્સના ભાવ વધતા ગ્રાહકોના ઘરખર્ચ પર વધુ અસર પડી શકે છે.

1 કિલો દહીં હવે ₹85માં મળશે

અગાઉ 1 કિલો દહીં ₹80માં મળતું હતું, જે હવે વધીને ₹85 થયું છે. એટલે કે એક કિલો દહીં પર સીધો ₹5નો વધારો કરવામાં આવ્યો છે. તે જ રીતે 380 ગ્રામ દહીંની થેલીનો ભાવ ₹35થી વધીને ₹37 થયો છે. જ્યારે 1 કિલો દહીંની બકેટ માટે હવે ગ્રાહકોએ ₹120 ચૂકવવા પડશે, જે અગાઉ ₹115 હતી.

અમૂલ રોઝ લસ્સી પણ ₹2 મોંઘી

દહીંની સાથે અમૂલની રોઝ લસ્સીના ભાવમાં પણ વધારો કરવામાં આવ્યો છે. અમૂલ રોઝ લસ્સીનો ભાવ ₹15થી વધારીને ₹17 કરવામાં આવ્યો છે. આ રીતે દૂધ બાદ દહીં અને લસ્સી જેવી દૈનિક વપરાશની ડેરી પ્રોડક્ટ્સના ભાવમાં વધારો થતાં ગ્રાહકોના ખિસ્સા પર વધુ બોજ વધ્યો છે.

12 નવેમ્બરથી દૂધના નવા ભાવ લાગુ

આ ભાવવધારો અમૂલના દૂધના ભાવમાં તાજેતરમાં કરાયેલા વધારા બાદ આવ્યો છે. ગુજરાત કો-ઓપરેટિવ મિલ્ક માર્કેટિંગ ફેડરેશન (GCMMF)એ 12 નવેમ્બર 2026થી અમૂલ બ્રાન્ડ હેઠળ વેચાતા તાજા દૂધના મુખ્ય વેરિયન્ટ્સના ભાવમાં આશરે 4%થી 5%નો વધારો કર્યો હતો. અમૂલ તાઝા ટોન્ડ મિલ્કના ભાવમાં પ્રતિ લિટર ₹2નો વધારો કરવામાં આવ્યો હતો, જ્યારે અમૂલ ગોલ્ડના ભાવમાં પ્રતિ લિટર ₹4નો વધારો કરવામાં આવ્યો હતો. આમ, દૂધના ભાવવધારા બાદ હવે દહીં અને લસ્સીના નવા ભાવ પણ ગ્રાહકોના રોજિંદા ડેરી ખર્ચને અસર કરશે.

આ પણ વાંચો: ગ્લોબલ સ્લોડાઉન વચ્ચે ભારતનો ડંકો: 2027 માં GDP ગ્રોથ 7.2% રહેવાનો અંદાજ

આ પણ જુઓ :