પોસ્ટ ઓફિસ બચત ખાતું બીજા શહેરમાં કેવી રીતે ટ્રાન્સફર કરવું? જાણો સંપૂર્ણ પ્રક્રિયા અને ફી

Post Office Savings Account: ઘણીવાર નોકરી, વ્યવસાય કે અન્ય પારિવારિક કારણોસર લોકોને એક શહેરમાંથી બીજા શહેરમાં સ્થળાંતર કરવું પડતું હોય છે. આવી સ્થિતિમાં જો તમારું પોસ્ટ ઓફિસમાં બચત ખાતું (Post Office Savings Account) હોય, તો તમારે જૂનું ખાતું બંધ કરીને નવું ખાતું ખોલાવવાની બિલકુલ જરૂર નથી. ઇન્ડિયા પોસ્ટના નિયમો અનુસાર, ખાતાધારકો પોતાના હાલના બચત ખાતાને એક પોસ્ટ ઓફિસમાંથી બીજી પોસ્ટ ઓફિસમાં ખૂબ જ સરળતાથી ટ્રાન્સફર કરી શકે છે. સૌથી મોટી રાહતની વાત એ છે કે ખાતું ટ્રાન્સફર થયા પછી પણ તમારો જૂનો એકાઉન્ટ નંબર બદલાતો નથી અને તેમાં જમા થયેલા તમારા પૈસા સંપૂર્ણપણે સુરક્ષિત રહે છે.

પોસ્ટ ઓફિસ બચત ખાતું ટ્રાન્સફર કરવાની પ્રક્રિયા

ઇન્ડિયા પોસ્ટના નિયમો મુજબ ખાતું ટ્રાન્સફર કરવાની પ્રક્રિયા એકદમ સરળ છે. આ માટે ખાતાધારકે સૌપ્રથમ પોસ્ટ ઓફિસમાંથી એકાઉન્ટ ટ્રાન્સફર માટેનું નિર્ધારિત અરજી ફોર્મ મેળવીને ભરવાનું રહેશે. આ ફોર્મમાં ખાતાધારકનું પૂરું નામ, એકાઉન્ટ નંબર, હાલની પોસ્ટ ઓફિસનું નામ અને જે નવી પોસ્ટ ઓફિસમાં ખાતું લઈ જવાનું છે તેની વિગતો ભરવાની હોય છે. જો કોઈ કારણસર નિર્ધારિત ફોર્મ ઉપલબ્ધ ન હોય, તો તમે પોસ્ટ ઓફિસમાં ટ્રાન્સફર માટે સાદા કાગળ પર લેખિત અરજી પણ આપી શકો છો. તમે આ ટ્રાન્સફર અરજી તમારી હાલની પોસ્ટ ઓફિસમાં અથવા તમે જ્યાં ખાતું ટ્રાન્સફર કરવા માંગો છો તે નવી પોસ્ટ ઓફિસમાં—એમ બંનેમાંથી કોઈ પણ જગ્યાએ જમા કરાવી શકો છો.

અરજી સાથે કયા દસ્તાવેજોની જરૂર પડશે?

ખાતું ટ્રાન્સફર કરવાની અરજીની સાથે તમારે ઓળખ અને સરનામાના પુરાવા તરીકે નીચે મુજબના દસ્તાવેજો જોડવા પડશે:

મૂળ પોસ્ટ ઓફિસ બચત ખાતાની પાસબુક (Original Passbook)

આધાર કાર્ડની નકલ

પાન કાર્ડ (PAN Card) ની નકલ

નવા સરનામાનો પુરાવો (Address Proof)

ખાતાધારકની સહી (જો સંયુક્ત ખાતું એટલે કે Joint Account હોય, તો તમામ ખાતાધારકોની સહી ફરજિયાત છે)

ટ્રાન્સફર પ્રક્રિયા દરમિયાન પોસ્ટ ઓફિસ દ્વારા નવા KYC (Know Your Customer) દસ્તાવેજોની પણ માંગણી કરવામાં આવી શકે છે.

કેટલી ફી ચૂકવવી પડશે અને પાસબુકનું શું થશે?

નેશનલ સેવિંગ્સ ઇન્સ્ટિટ્યૂટ (NSI) પર પ્રકાશિત માહિતી પ્રમાણે, પોસ્ટ ઓફિસ બચત ખાતાને એક શાખામાંથી બીજી શાખામાં ટ્રાન્સફર કરવા માટે સરકાર દ્વારા નિર્ધારિત ફી લેવામાં આવે છે. ખાતું ટ્રાન્સફર કરતી વખતે તમારે રૂ. 100 ચાર્જ અને તેના પર લાગુ પડતો ટેક્સ (GST) ચૂકવવાનો રહે છે. ટ્રાન્સફરની પ્રક્રિયા પૂર્ણ થઈ ગયા બાદ તમારો એકાઉન્ટ નંબર તો એ જ રહેશે, પરંતુ તમારે તમારી પાસબુકમાં નવી પોસ્ટ ઓફિસની માહિતી અપડેટ કરાવી લેવી પડશે.

પોસ્ટ ઓફિસ બચત ખાતાની જમા મર્યાદા અને વ્યાજ દર

પોસ્ટ ઓફિસમાં બચત ખાતું ખોલાવવા માટે ઓછામાં ઓછા રૂ. 500 જમા કરાવવા જરૂરી છે, અને ખાતું ચાલુ રાખવા માટે પણ રૂ. 500 નું લઘુત્તમ બેલેન્સ (Minimum Balance) જાળવવું પડે છે. આ ખાતામાં પૈસા જમા કરાવવાની કોઈ મહત્તમ મર્યાદા નથી, એટલે કે તમે તમારી જરૂરિયાત મુજબ ગમે તેટલી રકમ જમા કરી શકો છો. હાલમાં પોસ્ટ ઓફિસ બચત યોજના હેઠળ ખાતાધારકોને વાર્ષિક 4% ના દરે વ્યાજ આપવામાં આવે છે.

આ પણ વાંચોઃ રોકાણકારો માટે મોટી તક: આ અઠવાડિયે 9 નવા મ્યુચ્યુઅલ ફંડ NFO સબ્સ્ક્રિપ્શન માટે ખુલશે

આ પણ જુઓ

Watch onYouTube